沈祖堯「嬲」馬斐森無講辭職

【明報專訊】中文大學噚日舉行春茗，減肥有道嘅校長沈祖堯就先祝大家過個「瘦」雞年，要減肥成功咁話。2014年雨傘運動時，沈校長曾經同港大校長馬斐森齊齊去金鐘探學生，諗住佢哋都可能幾老友，但馬斐森上星期話辭職，沈祖堯就話完全唔知情，「我都嬲佢乜都冇同我講」。


馬斐森喺任期結束前辭職，將會到蘇格蘭愛丁堡大學做校長，沈祖堯話馬斐森係個好校長，唔會質疑佢嘅決定，又話馬斐森離去令「香港損失咗啲嘢」，但為佢搵到份好工作感到開心。馬斐森話近年香港嘅政治複雜，沈祖堯就話全世界嘅政治環境都複雜，英國有脫歐問題，美國同歐洲都面對緊政治問題，香港都唔例外，而作為大學校長，需要做嘅就係好好維護高等教育嘅學術地位。


中大上年因旺角大衝突取消春茗，今年就照舊喺校長住嘅漢園舉行，仲請咗一班來自唔同國家嘅學生跳「旗舞」，沈祖堯都「fing」咗一陣，又話「學生練咗120分鐘，我就練咗兩分鐘」，場面搞笑。