談擇偶條件 容海恩：陪睇恐怖片

【明報專訊】唔少人都呻喺新年拜年嗰陣，畀姨媽姑姐問幾時拍拖同結婚，被問到口啞啞。新民黨立法會議員容海恩（Eunice）噚日同傳媒新春團拜時，就話家好少人問佢幾時結婚，因為已經「問咗咁多年」，Eunice話結婚感情嘅嘢，隨緣啦。


Eunice一直低調拍拖，被追問感情事，佢笑住話「家啲男仔好難湊」，又話擇偶條件最重要係願意陪佢一齊睇恐怖片。Eunice話自己好鍾意睇重口味cult片，因為可以尋找刺激。


另一邊廂，「專業議政」莫乃光、梁繼昌同郭榮鏗3個立法會議員噚日亦同傳媒拜年（圖），莫乃光同梁繼昌分別準備自製齋菜同蛋糕（cupcake）畀記者享用，Emily試過味道都唔錯，但郭榮鏗偷懶，喺外面餅舖買蛋撻。


佢哋宴客前先舉起3幅賀年揮春，分別係「雞年和氣」、「萬象更新」同「踢走歪氣」，希望特首梁振英唔連任後，社會可以有新氣象，回復港人治港，重現程序公義咁話。


用手機無睇路 莫乃光撞穿頭

早前畀樹枝撞親額頭入院縫針嘅莫乃光，噚日就自爆原來係行街用手機無睇路而撞親，笑言係IT界人都會有嘅問題，佢話今次用頭幫大家擋咗血光之災，希望大家新年真正「鴻運當頭」。