撞正過年 東江水考察團又延期

【明報專訊】自從發生鉛水事件之後，港人更加關注食水安全問題。立法會發展事務委員會舊年就提出，要求政府安排議員去廣東考察東江水嘅供水系統，原先大家夾咗舊年6月去，但因為要配合內地部門嘅安排，最終安排喺今年2月19號至20號去，但考察活動又要再延期喇。


發展局喺年三十晚（1月27號）向立法會發展事務委員會回信話，按目前籌備工作嘅進度，加上撞正新春假期，估計唔能夠按原定安排喺2月去東江考察，加上原訂日期撞正工作日，會對立法會事務造成不便，所以建議延遲至4月14號至15號去考察，嗰兩日正好係復活節假期，認為可以避免影響立法會嘅事務，至於原先建議嘅考察行程就維持不變。


最先提出去東江考察嘅民主黨議員黃碧雲就同Emily話，今次已經唔係第一次延期去東江考察，認為發展局應該一早同內地部門傾好安排，而唔係改嚟改去。佢話原先有19個議員報咗名去，雖然改喺復活節假期出發佢都去到，但家改咗期都要重新問番大家，擔心有議員臨時去唔到，「梗係希望愈多議員去愈好」。