體雕大狀：推動兩岸和平統一 特首跑馬仔 仲有呢兩位

【明報專訊】特首選戰逐步升溫，大家對經常曝光嘅四大參選人或者唔陌生，但今屆選舉其實亦有幾個知名度較低，甚至名不經傳嘅人出戰。Emily近日翻查選舉事務處嘅特首選舉網上中央平台，就有7個報稱參選嘅人使用，除咗熱門4人，仲有梁思豪、簡惠芬同劉子頴3人。
簡惠芬（Jenny）大家比較陌生，問到佢參選原因，報稱係保險從業員嘅Jenny同Emily講，自己喺香港連續居住20年，亦符合法定歲數，所以出嚟選。佢現年58歲嘅，早有「選舉」經驗，2002年特首選舉都有宣告參選，最終陪跑入唔到閘。佢話今次參選無人助選，競選開支「唔會龐大」，承認暫時未有選委提名，又話無入過政黨，但形容「（特首）梁振英都唔係入政黨」。翻查平台資料，簡惠芬其中一項政綱，係「嚴肅徹查那些多年來違法施政的政府部門」。
至於梁思豪，就係去年落選立法會新界東補選、外號「體雕大狀」嗰位大律師，佢早前喺facebook公布8項政綱，當中包括「利用兩制優勢，以中介人角色推動兩岸和平統一」。究竟香港特首可以點推動「兩岸和平統一」呢？Emily噚日致電梁思豪，至截稿前未有回覆。
中央平台係畀參選人上載選舉廣告同支持同意書等資料嘅地方，選舉事務處話，只要有合資格參選人士公開宣布參選，並遞表申請使用平台，就可以上載資料。不過，參選人唔一定要使用平台，已宣布參選嘅民建聯前成員胡世全就係一例。