葉建源寫揮春 屢創新高贈張華峯

【明報專訊】迎雞年，教育界議員葉建源（圖）噚日喺立法會2樓走廊「開檔」，當走廊係花市咁即席揮毫幫記者同議員寫揮春，除咗青春常駐、心想事成等傳統祝福語，亦有人叫佢寫「取消TSA」、「上帝感召」、「我要真普選」等等，論盡時弊。葉建源擺檔一個鐘，有求必應，寫咗幾十張揮春。


葉建源喺「檔口」後面嘅牆就貼上「新聞自由正義伸張 編輯自主拒絕黑箱」對聯，話近年有唔少影響新聞自由嘅事，希望記者能繼續伸張正義。金融服務界張華峯行去開會途中都有捧葉建源場，獲贈「屢創新高」揮春一張。


（梁智康攝）