多人被挖入競選辦 湯家驊：無眼睇

【明報專訊】各特首參選人積極埋班，搵唔同人幫手打好選戰，有唔少年輕政治人物嘅組織「民主思路」就成為被挖角對象。民主思路創辦人湯家驊（Ronny）就喺facebook大呻，繼前政務司長林鄭月娥競選辦搶走佢兩名理事（李律仁同劉培榮）後，曾俊華競選辦又搶走民主思路總幹事袁彌昌及研究員忻浚賢。佢話只好咬緊牙關，希望呢啲人才選舉後可以回巢。


對於成員不斷離開加入競選辦，Ronny話「無眼睇」，佢話忻浚賢都係呢兩日同佢講，對選舉好有興趣，希望去拎吓經驗；Ronny更透露，上年參選立法會嘅麥嘉晉同黃梓謙最近亦蠢蠢欲動，會加入競選辦，佢都同兩人講最好唔好離開，但佢哋若要去幫手都無辦法喎。


剩數教授 民主思路「冬眠兩月」

Ronny話，民主思路目前得番幾個教授，近日亦有再同年輕人接觸，希望對方加入成為理事，但仲未成事，佢形容選舉兩個月時間，都唔知係咩光景，既然目前咁多理事去助選，民主思路都會「冬眠兩個月」，選舉後再睇吓最新形勢。佢又期望去助選嘅人選舉後都會回歸民主思路。