被指港大檢討報告無影 李國章覆張星煒：蠢無得醫

【明報專訊】香港大學教師及職員會主席張星煒前日電郵校務委員會主席李國章，話就嚟過年係時候追追數，校委會上年4月成立檢討大學管治專責小組檢討港大管治架構，但份報告仲未見影，批評佢無口齒，應該要話番佢自己係「大話精」，仲要求佢落台。李國章轉頭就回覆，話唔能夠同有偏見同狹隘嘅人講智慧同理性，並且話「stupidity has no cure（「蠢係無得醫」）」。
張促李快啲下台
張星煒封電郵副本畀晒所有港大教職員，話李國章原本應承上年10月出報告，之後話推遲到12月，不過家已經係1月底，仲未見到份報告，批評李國章唔守承諾，如果用佢自己嘅詞彙嚟形容就係「大話精」（李國章話過港大前學生會長馮敬恩係大話精）。張星煒話李國章嘅表現明顯達唔到校委會主席嘅合理標準，為港大好，應該快啲落台。
李國章鬧完人「蠢係無得醫」，並叫張星煒將佢個回覆畀晒所有教職員。張星煒之後回番電郵畀李國章，話完全明白同有偏見同狹隘嘅人講智慧同理性好難，但佢相信自己可以做到，家都做緊。張星煒又話，完全同意「蠢係無得醫」，雖然近年醫療技術進步得好快，但都叫李國章都唔使等新嘅療法（no one should wait for new cures），倒不如快啲落台好過。