思捷股東勁蝕 借題發揮罵管理層

【明報專訊】藍籌股思捷（0330）噚日開周年股東大會，雖然班管理層冇出嚟見記者，不過小琴就見到管理層激到班小股東好嬲。

點解會咁呢？原來喺去年嘅周年股東大會，思捷就送咗啲杯同筆畀小股東作為紀念品，但唔知點解今年就咩都冇得送，小股東已經唔係幾開心，而據講噚晚思捷會喺迪士尼搞周年員工晚宴，有小股東知道咗之後，嬲到指住財政總裁周福安鬧：「待己厚，待人（小股東）薄！」

不滿大搞員工宴 怒斥周福安

去得股東大會嘅，通常都係該股嘅忠實「粉絲」，好多仲係上咗年紀嘅老人家，難免都想拎番啲小禮物返屋企，不過小琴噚日在場所見，雖然思捷都有供應咖啡或茶，但係就見唔到有小食都紀念品畀小股東。

有位小股東開口問在場嘅工作人員：「有冇嘢送呀？」，但只係換嚟一句令人失望的答案。該位小股東之後破口大罵：「我成80蚊（股價）買你哋，依家得番40蚊，仲杯都冇一隻！」

其實上市公司除咗用業績同股息回饋小股東外，都唔爭在吝嗇嗰小小嘅紀念品，睇嚟思捷嘅管理層除咗要搞好公司持續虧損嘅批發業務外，仲要諗吓計番班小股東喎。