陳沐文任新會長 建築師學會：今年要休養生息

【明報專訊】建築師學會啱啱換咗屆，新會長由行內有30年經驗嘅建築師陳沐文（Marvin）擔任。Emily噚日去咗學會嘅傳媒聚餐，Marvin話今年要「休養生息」，Emily就話呢個諗法同參選特首嘅薯片叔叔曾俊華咁似嘅；副會長李國興笑言，學會唔係抄薯片叔叔，佢話「休養生息」唔係等同唔做嘢，只係今年延續番學會一般工作，因為上年適逢學會60周年，搞咗唔少慶祝活動。


今屆理事會有唔少年輕建築師面孔，例如「思政築覺」嘅關兆倫，被問到咁唔同嘅理事會組合會唔會造成「撕裂」呢？Marvin話雖然會內有唔同聲音，不過大家都係持續溝通，唔會「撕裂」，正如早前嚴迅奇獲直接委任負責西九故宮館項目嘅爭議，學會出聲明之前都傾咗好耐，內部有好多意見，但最終大方向都係想法一致。佢仲透露之前一直鼓勵年輕建築師出嚟選理事會，帶出年輕人嘅聲音。