臨時六四館 選址石硤尾

【明報專訊】支聯會嘅「六四紀念館」喺舊年關閉咗之後，場地重置未有期，支聯會主席何俊仁噚日出席年宵活動時話，將會喺石硤尾設置臨時紀念館，佢又鼓勵學校帶學生去認識歷史。
支聯會喺維園年宵攤位設置迷你六四紀念館，何俊仁喺年宵攤位開幕後話，支聯會將於5至6月喺石硤尾賽馬會創意藝術中心舉辦為期兩個月嘅展覽，展區佔地800呎。何俊仁又話，屆時會舉辦燭光晚會，希望學校可安排同學到場參觀，認識六四嘅歷史。
何俊仁話，支聯會期望今年多籌300萬元，以物色更適合嘅永久六四紀念館場地，盡量希望有獨立樓梯通往紀念館，以及鄰近港鐵站，方便市民前往參觀。
另外，支聯會維園攤位設有底片展覽，市民可以修改手機設定，透過鏡頭還原底片成為照片，何俊仁話呢個做法係寓意還原歷史真相。支聯會仲會出售六四USB，售價200元，入面儲存晒舊六四紀念館嘅展覽資料，方便市民喺屋企都可以了解六四事件。