介紹高產值花膠 CY訪魚排 提漁業基金

【明報專訊】特首梁振英（CY）噚日去咗大嶼山芝麻灣半島北部，參觀本地水產養殖，呢個魚排養殖場引入白花魚，主要用嚟收採魚鰾，製成產值高嘅白花膠，並混養石斑同黃鱲䱽，有效利用整個水體養殖。


CY話，「鮑參翅肚」中嘅肚又名花膠，係魚鰾，傳統智慧相信除咗味道好，仲對身體有益，當中以白花膠最珍貴。佢參觀嘅魚排，近年引入技術同品種，以養白花魚為例，魚苗成長到適合收採魚鰾需時最少約3年，因此要提升養殖場嘅競爭力及可持續發展，政府嘅支援對佢哋非常重要。CY不忘講吓自己政績，話佢喺2013年嘅《施政報告》提出成立5億元「漁業持續發展基金」，畀業界申請基金發展業務。