明報校記20年 逾300新丁開學了

【明報專訊】1997年創辦嘅「明報校園記者計劃」踏入20年喇！300多名新一屆校記噚日就齊集龍堡國際酒店，出席開學禮。今年計劃以「求知求真迎挑戰」為主題，今年我哋請咗前主播方健儀擔任司儀，其間資深傳媒人呂秉權、區家麟上台發言，向同學仔傳授心得；校園記者計劃得到恒生銀行默默支持十幾廿年，今年由Emily嘅前輩、人稱「水哥」嘅張樹槐代表出席，另有多個教育界組織大力支持並給予寶貴意見。
明報校記計劃歷年已經培訓咗8500名校記，佢哋採訪過嘅新聞人物不計其數。今年校記繼續有機會專訪各界名人政要，以往就訪問過啱啱宣布參選特首嘅前政務司長林鄭月娥同前財政司長曾俊華，同學仲會參加編採攝培訓班，收穫多多。
Emily希望新一屆校記盡情享受，緊記「求知求真」，做個懂得求真嘅小記者！