回應拆灣仔運動場爭議 劉江華交波畀蘇錦樑

【明報專訊】前日公布嘅《施政報告》提出拆咗灣仔運動場變會展，有立法會議員質疑，由做開會展嘅貿易發展局負責可行性研究有利益衝突。噚日民政事務局長劉江華開記招，Emily當然趁機會問吓局長點睇，點知佢一個轉身，將個波交咗畀商經局長蘇錦樑，話問蘇局長會比較清楚。


之但係，民政局負責統籌康體設施規劃，呢個項目點計都有佢份㗎，難怪有記者朋友即刻追問劉江華，係咪放咗手唔再理灣仔康體設施？佢就解釋自己有回應運動場銜接問題，不過會展方面由商經局負責。


被點名嘅蘇錦樑稍後出席另一記招時面對同一問題，就向貿發局笠高帽。佢話貿發局籌辦會議同展覽有經驗，對香港服務業亦有深厚認識，認為邀請佢哋做研究係適合嘅。佢話，相信貿發局會以客觀標準考慮，政府亦會提供意見，確保平衡會展同康體設施需求。