東瀛遊挑機杜如風豪華團

【明報專訊】面對網上旅遊預訂平台（OTA）同廉航嘅競爭，傳統旅行社縱橫遊（8069）早前就搞下噱頭，首次伙拍藝人杜如風推出8.8萬蚊日本豪華團。噚日東瀛遊（6882）執行董事禢國全話，公司早喺2009年已經洞悉有呢個市場，佢自己仲親自帶團出征。之前帶過嘅8日long-haul（長途）旅行團，閒閒哋10幾萬一個人，未開團已經爆滿，暗寸「杜如風豪華團」都唔係啲咩新嘢。


禢國全09年親上陣 反應熱烈

禢國全噚日同記者興高采烈分享佢帶「特邀團」嘅經歷，顧名思義，「特邀團」即係受特別邀請嘅團，唔係一般普羅大眾報到㗎！皆因「特邀團」唔會擺出市場售賣，啲團友都係受公司特別邀請嘅。禢國全話，之前試過包起意大利Ferrari法拉利博物館，喺入面食晚餐；你以為去旅行租架車自駕遊周圍去好威威咩？禢生話佢嘅「特邀團」試過以飛機代步！真係聽到成班記者流晒口水。


[小琴密語]