葉劉難忘麥理浩讚揚信 「英國人官員識做 特首應學習」

【明報專訊】已宣布參選特首嘅新民黨葉劉淑儀上載短片《我和我的四十年》介紹自己，首集大講初入政府時嘅經歷，回味咗殖民年代當官嘅故事，並讚賞當時嘅老細。
葉太前晚喺facebook上載長約12分鐘短片，講佢1975年入政府，做政務官先，第一個工作嘅部門就係銓敍科，即係依家嘅公務員事務局，處理公務員紀律事宜。佢當時負責出信通知被紀律處分嘅人，坦言試過出錯，畀人打電話大鬧一餐；更有人走上銓敍科找佢晦氣，因佢要代表政府列舉有關公務員嘅不當行為，佢話曾經好驚，做咗3個月就寫信請辭，當時嘅上司麥高樂（之後官至財政司）收信後忍咗一個星期搵佢傾，問佢有無搵到工，最終將辭職信彈回頭，叫佢做落去。葉太覺得麥高樂好好人，「諒解我年輕識淺」。
推區選 話當時傳媒無興趣
葉太又話，當年佢負責推動第一屆區議會選舉，當時更帶埋新聞官去「五台山」逐個電視台拜訪請對方報道，但無人有興趣，但佢話喺努力之下大家開始關注，後來更喺新界民政總署總部設立通宵直播室，每小時報數咁。
而最令葉太難忘嘅係港督麥理浩，雖然當年佢只係署理丙級政務官，但相信對方喺電視睇到佢不斷解釋選舉，推動地方行政；有一日佢收到一封有港督府印鑑嘅信，原來係「港督親筆去讚揚一個署理丙級政務官」，葉太覺得「呢啲英國人官員好識做囉，識得點鼓勵伙計，我哋啲行政長官應該學習」。