故宮諮詢斥資料少 姚松炎唔識畀意見

【明報專訊】政府計劃喺西九文化區興建故宮文化博物館一事，引起社會爭議，西九文化管理局上周三開始喺中環展城館展開興建故宮館嘅公眾諮詢，並設展板介紹。不過，立法會建築、測量、都市規劃及園境界議員姚松炎噚日去咗展城館後就大呼失望，話單憑目前嘅資料，「根本唔係一個有充分資料嘅諮詢，實在好難畀到意見」。


姚松炎同Emily講開話，展城館現場展板，3幅就介紹建築師嚴迅奇過往得獎嘅建築作品，根本同故宮無關，餘下嘅展板就介紹西九文化區整體規劃嘅改變、故宮館位置，以及嚴迅奇初步設計故宮館嘅9個造型，但故宮館嘅設計概念圖、內部設計、樓面面積甚至展覽場地面積呢啲基本資料，就一律欠奉，而建築成本嘅35億元亦無介紹到點樣計出嚟。


職員邀請填問卷

佢話，作為一個建築項目，業主往往最重視設計構思同概念，佢仲諗住現場「應該會講吓『寶盒』嘅設計理念、如何連繫到故宮文化」之類，點知失望而回。不過，佢話現場職員有邀請佢填問卷，但佢話需要時間諗吓點填，仲同職員講笑話會之後交番網上問卷，「唔會走數」。