楊岳橋求婚成功 未婚妻姓陳

【明報專訊】公民黨黨魁楊岳橋（AY）形象鬼馬，迷倒唔少女性，出街亦不時遇到粉絲要求「集郵」（合照）。不過Emily要向AY粉絲公布，AY好快會被「私有化」喇！皆因AY喺上年底（其實即係大約兩星期前），成功向拍拖幾年嘅女友求婚，好快會「脫獨」成為人夫。
AY嘅感情事一向都好低調，甚少談論，不過成功求婚呢件咁開心嘅事，AY噚日就同Emily透露少少細節，佢話喺12月底時同女友去咗兩星期旅行，包括去睇北極光，不過求婚當晚係睇唔到北極光，當時漆黑一片，無乜人在場，AY雖然無透露自己係咪雪地跪求，但笑笑口話求婚係「一擊即中」。至於幾時拉埋天窗，AY話結婚雖然有時間表、路線圖，但未有細節，當然亦要顧及雙方家長意願，但佢就話想低調處理婚事。
低調唔畀相 係事務律師
講咗咁耐，究竟AY女朋友係咩人呢？AY透露對方姓陳叫Eve，係事務律師，但佢同對方相識並唔係因為工作接觸，而係朋友介紹，相識至今大約4年。不過AY就點都唔肯提供同女友嘅相片畀Emily，話要保持低調。