韓圜跌 貪靚女士掃平貨

【明報專訊】經歷完11月嘅「黑色星期五」同埋12月嘅聖誕節，小琴個荷包已經遍體鱗傷，諗住今個月可以唞唞，點知韓國間化妝品集團AmorePacific，竟然靜靜雞喺上星期將香港旗下「雪花秀」同「Laneige」超過280種產品減價，減幅由3%到35%不等。咁啫係減幾多？舉個例子，Laneige「水凝潔膚泡沫」就由200蚊勁減去到130蚊，而雪花秀「順行潔顏泡沫」亦都由300蚊減到去230蚊，連好hit嘅雙色唇膏都榜上有名，各位女士係咪好想即刻衝去門店掃貨呢？


不過各位唔使急，今次AmorePacific香港並唔係新春限量減價，要大家喺幾日內迫餐懵搶平貨，而係一次過嘅減價，無期限。


小琴都好疑惑，乜香港零售市道真係咁差，要咁樣減價嚟搶客？非也非也。AmorePacific香港市務總監鄭載歡就話，其實集團不嬲都有檢視香港產品嘅定價，適逢近月韓圜不斷貶值，令兩地嘅產品價格有差距，所以香港就減價去貼近番韓國嘅售價，啫係不用分得咁細，大家都一樣平啦。咦，咁以後去韓國大家咪可以騰空多啲位去囤其他貨囉？


email: piano@mingpao.com

[小琴密語]