「新生利市封」 免費贈市民

【明報專訊】農曆新年臨近，市民除咗預備利市錢，亦要預備利市封。綠領行動過去一年破紀錄回收約27公噸、超過880萬個利市封，比前年嘅660萬增加超過三成；呢啲利市封經社福機構的工場篩選處理，變成超過400萬個「新生利市封」，今日起至年三十（27號），喺港、九、新界約270個派發點畀市民免費索取，其餘未能轉化成「新生利市封」亦會盡量留番嚟製作掛飾。


綠領行動話，領取利市封除咗可以減少浪費，亦可以為弱勢社群提供寶貴嘅工作機會，過去一年合共提供超過750個工作實習機會畀學員；有興趣嘅市民可以喺全港郵政局（1月16日至1月27日）、學校、議員辦事處、非牟利團體、商場、屋苑同賽馬會場外投注處領取。