法律年開啟禮致辭 袁國強讚同事無名英雄

【明報專訊】噚日係法律年開啟儀式，亦係現屆政府見證最後一次法律年開啟儀式，律政司長袁國強突然喺演辭結束前，話好榮幸喺呢段香港充滿挑戰嘅時間出任律政司長，仲向司法界同法律界所有為維護法治作出貢獻嘅人表達謝意；佢又特別感謝喺律政司嘅所有同事，讚揚以上各人都係默默捍衛法治嘅無名英雄。講到好似臨別贈言咁，唔通袁司長真係好似傳聞咁講下屆唔想再做？


不過，如果袁司長係為咗健康着想，Emily都覺得佢都係時候唞一唞，佢上司梁振英就久唔久放大假，但袁司長請得比較多嘅係病假，之前仲多次因為腸胃問題入院。


唔知袁司長喺大家心目中係唔係「英雄」，不過即使佢唔做司長都大把路數，例如佢可以好似前律政司長黃仁龍咁繼續執業搵真銀，話晒打官司都係自己生意，可能好過留喺「熱廚房」度焗到病，可能仲有多啲時間識人拍吓拖，希望佢新一年身體健康，快啲有蜜運啦。