勸田北俊少食花生 唐唐：食得多熱氣

【明報專訊】自由黨榮譽主席田北俊（田少）噚日起喺商台節目開咪，第一個嘉賓就請嚟相識咗30幾年嘅前政務司長、全國政協常委唐英年（唐唐）。田少話舊年退休之後，唔知點樣用啲時間，大部分時間都係搵孫仔玩，於是向唐英年請教點解佢退咗休都咁忙碌。


指CY政不通人不和

唐英年話田少年紀比佢大，唔敢教佢，不過就勸佢「唔好食咁多花生」。田少即刻反問﹕「食花生危害健康㗎咩？」唐唐就話，「唔係危害健康，而係食得多（花生）係會熱氣嘅」。


講到唐唐2012年喺特首選舉中落敗，都有唔少人安慰佢「塞翁失馬焉知非福」，唐唐坦言落敗有失望，但「心理狀態相當好」，當時衷心祝願當選嘅梁振英政通人和，不過梁振英卻「政不通、人不和」，但佢強調唔係幸災樂禍，因為做到政通人和就真係香港人之福。


唐唐話自己選輸咗雖然有失望，但無特別療傷，「我都係開咗支靚酒，同家人歎吓支靚酒，剝啲花生，睇吓新嘅行政長官點樣對付同泛民嘅敵我矛盾」。