天水圍醫院 老街坊讚樓底高通爽 指示牌「Patient」變「Paitent」

【明報專訊】天水圍醫院噚日局部投入服務，首階段先有3個專科開門診，當區街坊去睇醫生都可以慳番啲腳骨力。不過，醫院噚日有少少甩碌，電梯內指示牌將「病人聯絡中心」嘅英文「Patient（病人）」串錯做「Paitent」。天水圍醫院即日更正，黐咗張串啱字嘅紙條，仲話會正式更換。


居民專程去參觀

天水圍醫院坐落天壇街，大樓用咗唔少落地玻璃設計，可以採集自然光，病人可以望到院外景觀。Emily行上2樓，仲可以透過落地玻璃望向1樓嘅專科門診區。天水圍居民張伯知道醫院開放，噚日特登去參觀，佢大讚醫院樓底高，好通爽，而且景觀好，可以睇到樹喎。


按醫院指示牌，地下屬於詢問處、放射科，專科門診、藥劑部就位於1樓。不過醫院末完全啟用，4至7樓仍然未開放。