梁美芬徒弟 揀做bartender 聞有EMBA先做地盤建人脈

【明報專訊】喺城市大學教法律嘅經民聯立法會議員梁美芬，有唔少徒弟做咗律師、法官，而佢話上年有個成績好好、20幾歲嘅法學博士男學生，畢業後都去咗做「bar」，但唔係大律師barrister ，而係去酒吧做bartender（酒保）。


梁美芬話，年輕人有佢哋一套諗法，徒弟話喺酒吧可以接觸到唔同階層嘅人，睇到社會百態，工作有趣。梁美芬話，徒弟嘅媽媽好擔心，但梁美芬認為徒弟或者有自己嘅計劃。佢話好多大律師都鍾意打完官司後去酒吧消遣休息，話唔定徒弟會有機會結識到法律界猛人，將來跟到好老闆。


梁美芬又話，知道以前有一個讀完EMBA（行政人員工商管理碩士）課程嘅畢業生，走去地盤做咗半年工人，當人人都覺得奇怪時，呢名畢業生就喺行內廣交朋友，半年後做咗判頭變成老闆，仲因為佢嘅背景及本身學識，接到唔少大生意。


盼多與年輕人溝通

梁美芬就話，今年佢都希望多啲同年輕人溝通，會去多啲學校活動，就算自己係建制派都唔使驚嘅，好似早前去咗兩場學生論壇，同台都有香港眾志黃之鋒。佢話年輕人有唔同諗法，但其實大家坐低都可以理性溝通，而佢都期望下任特首能夠做到同年輕人對話。