「朱凱廸你提X咗……呀！」 波哥粗口諧音笑翻議事廳

【明報專訊】上一個猴年，大台有一段有關足金「金」猴嘅往事，令好多網民至今念念不忘，估唔到類似一幕，再喺猴年，喺立法會出現。立法會財委會噚日原定要討論高官加薪撥款，最終喺一眾泛民議員積極提問，再提出23項臨時動議嘅情况下，搞到第一項有關幼稚園津貼撥款傾足4個鐘。財委會主席陳健波（波哥）喺會議尾聲，就講明唔會開始高官加薪嘅議程，但波哥可能開會太耐有啲攰，處理朱凱廸份動議時就將「提交咗」講成「提X（粗口諧音）咗」，搞到議事廳嘅議員哄堂大笑。


叫大家唔好心邪

財委會噚日由下晝3點半開到夜晚7點半，尾段仲有唔少議員提交咗共23項臨時動議。不過，當會議處理到第二項臨時動議時，波哥已經宣布「投降」，講明表決完幼稚園津貼撥款就散會，叫「大家返去休息吓啦，咪下個星期再拉（拉布）過囉」。聽罷有唔少議員話可以撤回動議，民建聯周浩鼎仲向住提出動議嘅社民連梁國雄大叫「一定要撤啦」。


「撤」同「唔撤」嘅聲音響遍會議廳，而仲整理緊臨時動議嘅波哥，就口快快話「朱凱廸議員你提X（粗口諧音）咗成……呀！提交咗……」，原來佢係想話朱凱廸提交咗20幾個動議，得一個過到；但波哥知道自己疑似爆粗，都即刻呼籲大家唔好咁心邪。


不過，身為主席嘅波哥可能真係好緊張，叫議員表決時不停將「贊成處理呢項動議」，講成「贊成呢項動議」，要內會主席李慧琼係會上提咗佢3次，先記得改返口。