央視窒3Q：道歉似辯護

【明報專訊】3Q大戰開戰之後，負責管理互聯網的內地部門工信部，一直都只係幕後施壓，唔少網民都有怪責工信部無做嘢，工信部終於前日發威，出通告喝斥騰訊（0700）同奇虎360，要喺5日內向廣大網民道歉。

騰訊：太過注重「是非曲直」

兩家公司當晚立刻喺當晚乖乖出聲明，其中，騰訊發表一封名為「和您在一起」的道歉信，話自己公司一開始，太過注重「是非曲直」、「誰對誰錯」，一時之間忽略用戶感受。騰訊有感「QQ用戶群愈大、自己責任愈大」，仲係結尾同QQ用戶講「無論過去、現在還是未來，我們的心願不變，和你在一起。」

咁煽情，唔知QQ用戶有咩感覺呢？但佢哋嘅道歉，似乎都得唔到當局嘅認同。事關，央視評論員、兼社科院亞太研究所政治室副主任葉海林噚日，立即狂轟佢哋道歉，好似「自我辯護」一樣。葉海林仲話，騰訊同360都係工信部嚴密督促之下，先至會對外宣稱和解，但他們心底裏都是不情不願。

先前，有廣東網民為咗表達對3Q大戰嘅無奈，都專登搞咗場3Q婚禮放上網，等QQ嘅招牌企鵝，同代表360嘅十字架，交拜成親，網民咁有心思，小琴都希望佢哋相親相愛，無謂不情不願，扮和解喇。