鄭松泰：黃洋達10月已退出熱血公民

【明報專訊】過往常聲言「勇武抗爭」嘅熱血公民黃洋達，近期喺街頭活動唔多見佢身影，Emily噚日見《立場新聞》訪問熱血公民主席、立法會議員鄭松泰，佢提到熱血公民短期將全面撤出社會運動，推動政黨化，而黃洋達已退出組織，黃將主力運作《熱血時報》；而過往係《熱血時報》支持「熱血公民」嘅營運，日後兩者會分開運作。


Emily噚日問鄭松泰，佢話其實黃洋達於去年10月底已經正式退出熱血公民，唔再係組織成員，日後熱血公民會政黨化，架構會有調整，料在下月內完成，如「首領」嘅身分會改為「主席」，第一屆主席由鄭松泰本人做，鄭錦滿則為副主席；而據他所知，由黃洋達任老闆嘅《熱血時報》就會公司化，自聘僱員。Emily留意番黃洋達呢排喺佢facebook嘅帖文，除咗熱血時報嘅文章外，主要係分享吓熱血公民年宵產品，又或是跑步資訊。