公民黨請專人搞生日會

【明報專訊】公民黨新一年有唔少大計，目標係希望可以凝聚黨員，以及吸納更多新血。為咗令黨員有更豐富嘅黨內生活，公民黨正公開招聘「黨務和活動專員」，負責籌辦黨內活動，包括生日會。不過有公民黨員笑言呢份唔係「絕世筍工」，因為除咗生日會，仲要度橋吸納新黨員。


為咗凝聚黨員，公民黨今年起打算定期為黨員搞生日會。Emily聽聞生日會條橋係創黨主席關信基向現任主席梁家傑獻計嘅。


有公民黨黨員同Emily講，過去幾年公民黨打咗好多場選舉仗，新一屆執委都希望可以加強黨務工作，因此聘請「黨務和活動專員」係配合黨務發展，除咗要籌辦黨內活動，仲要幫手度橋、諗新方法吸納新黨員。公民黨目前有兩個執委專責黨務發展，包括前主席余若薇及法律界立法會議員郭榮鏗。