葉劉獲BBC贈鐵娘子外號 評財爺 「友善未必最好領袖」

【明報專訊】新民黨葉劉淑儀宣告選特首後，英國廣播公司（BBC）同佢做咗個訪問，話佢有個「Iron Lady（鐵娘子）」嘅外號。葉太又被要求評價有機會參選嘅兩個司長，對於財爺曾俊華民望較高，葉太就話，表現友善嘅人通常未必係最好嘅領袖（those who play nice aren't always the best leaders）。


葉太喺訪問中再被問起當年因推動23條立法而離開政府嘅事，佢話好多人只記得佢推動23條失敗，但忘記咗佢所作嘅貢獻。訪問中又提到香港人有以「RIP」（葉太英文名是Regina Ip，而英文縮寫「RIP」可解作「Rest in Peace（安息）」）嚟形容佢參選，但文章結尾都話，葉太唔係一個輕言放棄嘅人。


見工聯會「氣氛融洽」

葉太近日都密密工作，噚日同其競選辦團隊先拜訪工聯會，雙方會面大約1小時，由工聯會理事長吳秋北、副會長兼秘書長黃國、副理事長唐賡堯負責接見。不過其他立法會議員、工聯會會長就全部缺席。被問到會唔會覺得自己唔受重視，葉太就話好感謝對方，因為知道大家仲放緊假。佢又透露，已經陸續約緊四大商會。


葉太強調，今次並非「拜票」，亦無要求對方提名，話應該畀工聯會多啲時間聽取唔同候選人政綱先。佢會後形容，今次見面「氣氛融洽」。葉太嘅競選團隊噚日亦一齊現身，包括代理人曾向群、競選辦副主任王政芝、總聯絡主任黃楚峰等。