新媒體 《眾新聞》元旦面世

【明報專訊】由一班資深新聞工作者，以及新聞學者創辦嘅新媒體《眾新聞》將會喺元旦日面世。非執行董事麥燕庭話，《眾新聞》理念係希望回歸新聞初心，為公眾利益服務，當然都需要公眾支持，將會透過眾籌500萬元同訂閱計劃去營運。《眾新聞》除咗會有自己嘅編採團隊，亦會有資助計劃，讓自由身記者同公民記者申請資金做採訪。


眾籌500萬 接受公眾監督

陣容方面，總編輯由台灣《蘋果日報》前網路中心總監李月華擔任；其中一名非執行董事係記協前主席麥燕庭。其他成員包括《明報》前執行總編輯姜國元（安裕）同《南華早報》前資深政治編輯楊健興（Chris Yeung）等，安裕同Chris Yeung仲會負責寫新聞拆局。


《眾新聞》嘅facebook噚日面世，強調無黨無派，不設既定政治立場或政策傾向。同時接受公眾監督，設有由獨立人士組成嘅操守委員會，處理公眾就《眾新聞》運作係咪符合新聞專業操守嘅投訴。