CY宴客搞gag 稱貴賓「不務正業」

【明報專訊】特首梁振英（CY）宣布唔競逐連任後一啲都無空閒，近期頻密約見唔同界別人士到禮賓府午宴小聚。繼前日同幾十名建制派區議員及地區團體領袖交流後，佢噚日中午又約咗一班建制陣營嘅專業人士食飯。不過想同CY午宴唔係人人有份，CY喺開場白搞吓gag，笑言在席嘉賓都係「不務正業」，意思係指佢哋除咗有自己事業，仲利用公餘時間積極貢獻社會，支持公民事業。


咁邊個先夠「不務正業」？今次獲邀出席者有約50人，包括民建聯大狀馬恩國、反佔中律師陳曼琪、七警案律師陳永良、剛獲委任監警會成員嘅律師錢志庸、全國政協委員簡松年、風采中學校長何漢權、立法會前漁農界議員黃容根等。


何漢權話，席間有向CY提出，過去19年教育出現唔少問題，未來十年中小學係重中之重，對方亦表示認同。CY任期餘下半年，但何漢權都繼續「開單」，希望CY喺下月施政報告中處理埋中史獨立成科問題。