工展會請基層倒數購物 花680萬

【明報專訊】出年香港回歸20周年，廠商會將舉行連串活動慶祝，頭炮係喺今年除夕夜「送暖」，透過社署、東華三院同多個慈善機構，請2500個基層家庭約1萬名市民免費遊工展會、欣賞表演同倒數迎新年，兼送每人300元現金券購物。會長李秀恒噚日同傳媒茶敘話，活動花費680萬元，當晚大約九成攤位已經應承做大特價，「半賣半送」貨品畀基層市民。


李秀恒話，自己過往喺除夕夜會同朋友倒數，今年就選擇出席維園活動，亦感謝各個攤位嘅員工願意加班。政務司長林鄭月娥同多個局長屆時都會捧場。今次有林鄭支持，將來又會唔會喺特首選舉支持對方呢？李秀恒笑言係「兩回事」，話只要係有意義嘅活動，廠商會都會大力支持，唔局限於邊一個人物或職位嘅。至於特首梁振英就話有事去唔到。