飲食協會蛇宴籌款 助培訓廚師人才

【明報專訊】以本地中廚大師傅等會員組成嘅群生飲食技術人員協會，周二晚首次喺香港搞咗個慈善蛇宴，由一班大廚義務煮咗12圍，為勞聯智康協會嘅「英才賽馬會教育中心」籌款，以便增添器材設施、培訓廚師及點心師傅等人才。


本身為大廚嘅群生理事長許美德（德哥）同Emily講，未來希望可以成立慈善基金，除咗扶助長者或賑災外，仲可以用嚟設立獎學金，資助有志到海外參與國際烹飪比賽嘅廚師，作為買機票及當地住宿開支，以助更多港廚可以揚威海外。


李力持捐郵票拍賣

Emily聽到時，就諗起咁咪好似電影《食神》中，史提芬周出戰比賽咁囉。其實，呢場慈善宴嘅氣氛都好有食神feel，有大廚們上菜，展現各拿手菜式，成班大廚師兄弟又唱歌，中途仲突然有獲邀到場嘅《食神》導演李力持為佢捐出嘅郵票拍賣。