南港島線今通車 頭班車5﹕55

【明報專訊】南港島線（東段）今日通車喇，相信可以減少南區居民免受香港仔隧道塞車之苦。Emily留意到港鐵發出咗車站通告，今朝清晨5點15分，海怡半島站位於海怡路嘅B出口會率先開放，其餘出入口就會喺5點50分開放。


金鐘轉車認住青色指示

按照行車時間表，由海怡半島往金鐘嘅頭班車原定朝早6點開出，全程需11分鐘，不過港鐵安排咗一列「開通專列」，提早喺5點55分由海怡半島開出，至於金鐘開往海怡半島嘅頭班車就喺大約6點10分開出。


南港島線駁去港島線或荃灣線都需要喺金鐘轉車，呢個「超級轉車站」擴建咗做6層，南港島線月台喺最底層。為免市民初期「蕩失路」，港鐵日前喺facebook專頁放咗條片，教人點樣喺金鐘站嘅南港島線月台轉車，叫大家認住呢條線嘅青色標示同其他指示。好多人擔心新線通車會迫爆金鐘站，港鐵之前透露有需要時會控制人流，而新線雖然採用無人駕駛列車，但仍然會安排車長跟車。