有話說﹕親子遊「天書」 陪仔女盡情玩

【明報專訊】近排大家都嘈緊TSA應否繼續存在，只因為各位家長都想留返個開心童年畀仔仔女女！計Mama話，開心嘅童年，除咗唔使日日操卷做功課之外，就係做爸爸媽媽嘅要留返足夠時間陪仔女盡情去玩！之但係香港咁細，個個星期都去玩嘅話，會唔會諗唔到去邊呢？

唔怕！最近Mama發現咗一本專講本地親子遊嘅「天書」《親子200遊》，裏面推介咗200個港九新界嘅景點，仲分成兩大部分﹕「戶外篇」以活動類型分類，如「青葱大草地」、「親親小動物」等；而「室內篇」則是按照十八區，逐區細數100個下雨天寒風天都可以躲進室內嘅好玩地。


呢本書係由兩個曾經擔任教育出版工作嘅May（小尾）同盛杰合作自資出版，佢哋雖然都未有仔女，但係因為以往嘅工作關係，同好多家長甚至教育界人士都非常熟絡，經大家推介下，自己更親身去到每一個景點，睇下係咪真係啱帶埋小朋友去，例如交通係咪方便啦、好玩程度啦，篩選過後先推介畀讀者。


你可能會問，香港邊有咁多親子地方呀？咪又係來來去去嗰幾個！嗱，Mama冇呃你嘅，例如介紹草地，除咗你同我等媽媽輩熟悉嘅熱門地方如佐敦谷，仲有一啲鮮為人知嘅秘地如深涌大草原，如果你未去過或者冇朋友介紹，真係唔會知道香港仲有呢啲隱世景點！小尾話﹕「香港好多地方其實都值得帶小朋友去睇下，好似屯門公園大家可能都去過，但係又未必知道裏面有個免費參觀嘅昆蟲館；又好似南區嘅伯大尼修院，你又知唔知原來係可以入去參觀呢！」Mama都真係而家先知呢！

盛杰仲話其實呢本書嘅出現，係由佢哋過去一年辭掉工作自資製作及成立嘅本地親子旅遊網站開始，主要想為香港下一代出一分力。「希望香港小朋友唔好只顧住上興趣班和學業成績，可以同父母一齊締造很多長大後能夠念念不忘的親子回憶。」各位爸媽，今個周末你地應該識得點做啦！唔好再同仔女匿喺屋企溫書困獸鬥啦，一齊動身出去玩下啦！