大班聚會即興「組班」 翟紹唐大輝被點名做司長

【明報專訊】特首選戰如火如荼，「民主300+」逾325張選委票都要諗諗點運用。佢哋上周六第一次開會，Emily聽聞會上有人提議，不如搵啲口才好嘅泛民人士入閘，例如長毛梁國雄、大班鄭經翰或者黃毓民，到時可以同一眾建制候選人辯論。


不過唔知有心定無意，原來上個禮拜，監警會一班舊成員搞咗個聚會，茶餘飯後之間，鄭大班講起特首跑馬仔，仲喺飯枱上即場「組班」，點名叫在場嘅監警會前主席、資深大律師翟紹唐做律政司長，有金句大師之稱嘅林大輝做政務司長，熟悉會計嘅梁繼昌就可以做財政司長，但現場人士都當大班「吹水」。


陳馮做特首？李國麟：好笑

另一邊廂，外界有傳下任「真命天子」另有其人，其中世界衛生組織總幹事陳馮富珍早前亦被人點名。原來立法會衛生服務界議員李國麟一早喺陳太任衛生署長時已經認識佢，仲以花名「雞珍」相稱，指對方經常返香港，自己仲不時同佢老公打麻將