沒有男朋友 葉劉﹕不會有緋聞

【明報專訊】新民黨主席葉劉淑儀之前宣布參選特首，佢個競選標誌就成為網上熱話，據Emily了解，葉太今次宣布參選大會嘅「幕後玩家」係國際傳訊公司Mazarine AsiaPacific （眾智亞洲），呢間公司早排仲同何超瓊創立嘅天機公關合併，何超瓊喺參選大會開始前都有現身撐場。不過，呢個參選logo其實係另一個年輕設計師負責，唔係公關公司提供嘅。


葉太當日係灣仔會展宣布參選特首時，用口號「贏返香港」（Win back Hong Kong）做主題。眾智亞洲嘅負責人回覆話，佢哋主要負責活動流程，標誌設計同新聞稿等資料就由葉太嘅競選辦提供；Emily再打畀競選辦有關負責人了解，佢話整個宣傳活動同設計係由多方嘅人整合意見而成。


葉太噚日又提到，自己2003年以嚟一直卧薪嘗膽，嘗盡冷暖，她話2005年回港後嘅10年好辛酸，「唔係高官，（要）向人拜票，唔係求選票就係求鈔票（籌款）」，見盡人情冷暖。


被問到有冇黑材料會被揭發，佢話已向行政會議申報財產，健康狀况亦可以隨時公開，加上「我無咩緋聞，想搵男朋友搵唔到」。