讚完葉劉 田二少又讚Miss Mo「坦率得可愛」

【明報專訊】新民黨田北辰日前喺葉劉淑儀參選大會上，公開讚葉太「坦率得可愛、堅持得可敬」，估唔到一日之後，田二少又讚女議員「坦率得可愛」，今次得到「垂青」嘅係Miss Mo毛孟靜！

事緣噚日立法會交通事務委員會討論的士業界嘅問題，田二少提出議案要求政府盡快全面落實喺的士車廂安裝攝錄系統，但議案一出泛民議員嘩然，話會侵犯乘客同司機嘅私隱，後來田二少修訂自己嘅議案，話「寫無寫得咁細節，想喺口頭補充」，佢想講嘅其實係喺的士車廂安裝「只攝錄司機」嘅攝錄系統。


支持田二少議案嘅除咗建制派議員，今次仲有Miss Mo，連委員會主席陳恒鑌見到都問多次Miss Mo係支持定反對；其他泛民議員就投反對。最後田二少議案喺16票支持、14票反對下通過。田二少仲即場走去Miss Mo度握手致意。


議案獲Miss Mo支持 讚無跟大隊

田二少同Emily講話，喺的士安裝剩係影司機嘅攝錄系統，可以加強阻嚇力，令啲司機唔敢亂咁拒載，或者濫收車資，長遠有助改善的士嘅服務質素。佢又話，Miss Mo當時無跟到泛民大隊投票，話呢個議案唔錯，佢讚Miss Mo原來都係「坦率得可愛」，又明白事理。