議員助理請願 不滿行管會出入限制

【明報專訊】立法會外面時不時都有團體請願，勢估唔到連立法會議員助理都要出嚟抗議。原來早排青年新政梁頌恆、游蕙禎聯同助理硬闖會議室，一度同保安衝突，令行管會實行新出入安排，每個議員只有兩個助理可以喺立法會開會嗰陣入去大樓一、二樓。雖然梁、游已經被取消議席，不過呢個安排就繼續落實。


超過20個議員助理噚日喺立法會外請願，指摘呢個做法極之荒謬，事前亦完全無諮詢過議員助理，唔尊重佢哋嘅專業。佢哋向主席梁君彥發公開信，要求召開特別行管會撥亂反正，恢復舊安排。教育界葉建源、民主黨林卓廷都有現身力撐下屬。


立法會議員助理關注組發言人沈偉男話，如果梁君彥遲遲唔回應，唔排除有進一步行動，包括發起不合作運動去維護尊嚴。