Google年度關鍵字 Pokémon GO最熱

【明報專訊】有嘢唔明唔識，現今唔少人都會先Google搜尋一下，噚日Google公布2016年搜尋排行榜，結果月前風靡全城嘅手機遊戲Pokémon GO榮登「熱爆關鍵字」榜首，其次係新電視台ViuTV，第三位係韓劇《太陽的後裔》。


時事人物 朱凱廸輸畀游蕙禎

雖然朱凱廸喺立法會選舉中成為票王，但佢喺Google本地時事人物搜尋中就輸咗畀游蕙禎，屈居第二，第三位係近期自嘲為雙失廢青嘅梁天琦，而梁所屬嘅本土民主前線，就喺本地熱爆議題嘅搜尋中排第九。十大時事人物中，完全無官員名字。


本地熱爆議題搜尋三甲，分別係立法會選舉、新界東補選，以及超級區議會，市民搜尋反映佢哋嘅關注點，十大全為政治及房屋問題。


今年政治新聞多，相關簡稱用字日多，今年最熱爆嘅詞彙含意搜尋，排頭位係DQ，即「取消資格」（Disqualify）；其次係「PPAP」，即日本藝人PICO太郎嘅洗腦歌Pen- Pineapple-Apple-Pen；第三位為內地潮語「藍瘦香菇」，意即「難受」及「想哭」。