南旋爆TOMMY同CK爭衫

【明報專訊】專做針織品嘅製造商南旋控股（1982）有唔少做時裝嘅大客，好似UNIQLO、TOMMY HILFIGER咁，呢啲大公司通常都有自己嘅研發部門，不過，有時都會睇吓製造商有咩筍野可以介紹番。南旋控股近年就做多咗自家設計嘅衫Sell客，噚日首席營運總監王惠榮出席傳媒午宴嘅時候話，啲大牌子幾Buy公司嘅設計，但就試過撞正兩個Brand睇中同一件衫，當時都幾頭痕。


王惠榮話，公司曾經設計過一款針織tee，本身件tee心口前有兩個口袋，噚日王惠榮都帶咗嚟畀記者朋友睇，小琴摸上手都覺得幾舒服。不過，呢件衫竟然同一時間畀TOMMY HILFIGER同Calvin Klein（CK）睇中咗。賣畀其中一個，又會得失另一個客、兩個都唔賣就仲傻豬！有生意都唔做咁折墮，咁最後點解決？最後，TOMMY嗰件心口做少咗個袋，件事就係咁解決咗。


[小琴密語]