被問跑馬仔 周凱旋﹕我嘅意見唔重要

【明報專訊】特首選戰好熱鬧，唔少人都食晒花生等睇戲，長和（0001）主席李嘉誠嘅「紅顏知己」周凱旋，昨日被問到政府兩名司長都可能出選嘅事，佢就講笑話佢嘅意見唔重要，「因為我無得投票」。不過，佢話如果多啲人出嚟，願意服務香港幾好吖，又話中央同香港人利益係一致嘅，大家都想搵一個特首會更好地服務（better serve）香港，仲反問﹕「這不是值得慶賀的事嗎？」


周凱旋噚日以創投公司維港投資負責人嘅身分，出席一個音樂科技產品發布會，記者問佢點睇特首選戰，仲問佢點睇財爺曾俊華呢個人，但佢就話唔回應呢啲問題喇。


講到科技創意，周凱旋就好關心，話因為人人都會講創新科技，家中央政府非常重視，世界有咁嘅需要，所以佢話無論邊個服務香港，最終都會喺創新科技方面好着力，而佢哋噚日搞嘅科技推廣活動，都得到科技公司同好多人支持。