新聞類別
財經
詳情#
【明報專訊】香港打工仔日做夜做，生活真係幾苦悶，唔少人會喺公餘時間報讀興趣班，令生活有返啲意義。不過，學費係一個好重要嘅考慮因素，如果要小琴大拿拿拎成幾萬蚊讀個course，上車之日真係可能要等到2047！最近香港中華煤氣（0003）同法國廚師會搞廚藝班，讀晒成個course順利畢業要近20萬，你以為冇人讀咩？錯！課程今年已經開到第8屆，屆屆爆滿，睇嚟真係有好獨特吸引力。
香港中華煤氣高級零售市務及營業經理王佩兒話，呢個課程唔單止針對鍾意煮嘢食嘅人，而係追求專業烹飪水準嘅學生。如果順利畢業，就可得到法國教育部頒發「法國廚藝訓練第五級證書」；有咗呢張沙紙，學員直程可飛去法國做廚師、開餐廳！雖然成個course要成20萬，但王佩兒話，相比起全球享負盛名嘅法國藍帶廚藝學院（Le Cordon Bleu）嘅課程，香港讀嘅學費只係法國嘅三分之一。佢仲講笑咁話：「成個course讀哂540個鐘先19.5萬，除返開每個鐘都係361蚊，抵過囡囡上playgroup㗎！」
至今累收逾84人
其實個course一開始只係收5萬起，但前幾屆已經加價至6萬起跳，可想而知，呢類sell專業資格嘅課程真係有market！王佩兒話，過去6屆已經收咗逾60個學生，班班都full晒，所以今年連搞第7、第8屆，合共收24個學生。屈指一算，中華煤氣今年淨係呢個course，收入已經高達468萬，咁咪賺到笑？王佩兒話，收得貴都係因為成本高，成個課程嘅食材都係由法國直送、老師又係法國名廚，評核考試嘅考官次次都係由法國專程飛嚟，計計埋埋啲食宿機票，都唔係一盤賺大錢嘅生意，至今只係足夠自負盈虧咋。
email: piano@mingpao.com
[小琴密語]
留言 (0)
