反彩虹獅子前夕 聯署網疑被破壞

【明報專訊】為咗表達對LGBT（不同性傾向及跨性別人士）嘅尊重，匯豐早前喺中環總行樓下擺咗一對「彩虹獅子」，但惹嚟「性傾向條例家校關注組」批評，組織星期三仲會去「彩虹獅子」嗰度，將反對聯署表交畀匯豐。但組織召集人黃偉明噚日話，用嚟收集簽名嘅google聯署表，喺9號開始收唔到聯署資料，之後即使收到，但文字全部變成亂碼，家唯有改用另一個平台收集聯署。


黃偉明話，google文件嘅安全度唔高，可能係有人惡意破壞聯署文件，令資料有損毁。佢仲話，如果真係有人特登破壞聯署表，估計有可能係支持同性戀運動嘅人士、google或者匯豐銀行人士所為。


而匯豐就該組織周三去表達意見一事無新回應，只係重申尊重個人信念同追求平等係公司核心價值。