特首智囊邀日央行行長來港

【明報專訊】美國第二輪量化寬鬆「放水」行動一出，全球財長即時「頭痕」，既要做定防洪措施，亦要擔心另一重要經濟體系日本，會否跟隨美國加碼「放水」。要是美、日兩支強力水喉齊齊「泵水」，新興市場嘅資產價格定會水漲船高，遲早釀成資產泡沫，等待爆破嘅一天。

首在日以外的亞洲地區公開演說

我哋出名反應迅速嘅特區政府當然唔敢怠慢，不斷「溫馨提示」大家會有泡沫風險，噚晚亦都出手防範樓市泡沫。適逢其會，現任特首智囊嘅智經研究中心，下個星期二就請咗日本央行行長白川方明來港發表演說，講題非常宏大，係「日本及亞洲地區在金融海嘯後的經濟發展」。原來呢次白川方明來港，係首次響日本以外嘅亞洲地區公開演說，話晒一場嚟到，小琴估計特首同本港財金高官，都應該會同佢見吓面啩！

唔知特區政府會唔會順便同白川方明交流吓，了解吓日本何時「泵水」、日本如何響零息環境下生存之類嘅問題呢？