新聞類別
財經
詳情#
【明報專訊】最近啲新股一上市就潛水，搞到小琴身邊嘅朋友唔少都要損手，包括噚日上市嘅熔盛重工（1101），以低招股價0.5％嘅7.96元收市。講起熔盛，小琴就諗起之前《明報》都報道過，話如果熔盛招股價以上限10.1元定價，佢嘅大股東張志熔就好有機會一躍成為內地第二富。
可惜世事永遠都唔係盡如人意，最終熔盛以近下限8元定價，張志熔與第二首富緣慳一面，不過計番條數，熔盛上市亦足以令張志熔進佔內地富豪榜第3位，攞番個銅牌。
娃哈哈董事長 622億身家稱霸
根據福布斯上月公布嘅中國富豪榜，娃哈哈集團董事長宗慶后以621.8億元身家稱霸，排第2位嘅係身家559億元嘅百度董事長李彥宏，第3位係三一重工集團董事長梁穩根，佢嘅身家就有460億元。睇番嗰陣時嘅富豪榜，張志熔以178億元身家排第26，排名唔算好高，但係過咗個半月之後，件事又唔係咁講法啦。
持恒盛股權 躍升第3位
熔盛上市之後，張志熔持有56%股權，佢亦都同時以招股價8元出售3.5億股舊股，以噚日收市價7.96元計，呢批合共42億股份值成334.5億元。張志熔亦持有恒盛地產（0845）65.38%股權，以恒盛噚日收市價2.96元計算，股份市值150.8億元。計落張志熔嘅身家已經暴漲1.7倍至485.3億元，啱啱好超過身家460億元嘅梁穩根，登上第3位。
報料電郵﹕piano@mingpao.com
回應 (0)
