賀40年辦攝影賽 海洋公園送4000飛

【明報專訊】海洋公園明年1月就開業滿40年，樂園宣布今個月會舉辦「集體造回憶」嘅攝影比賽，將送出4000張免費入場門票，比賽得獎者仲可以得到10年有效嘅「智紛全年入場證優越卡」4張。


由聽日（7日）至今個月29日期間，香港市民可以遞交一張2011年或之前，喺海洋公園影嘅舊相，連同一張今年喺樂園影嘅近照，加個簡短說明就可以參賽。樂園會以先到先得形式，向合資格參加者派發一共4000張免費飛。海洋公園話，每名參加者獲派嘅門票數量，取決於有幾多相中人同時出現喺新舊照入面。


之後海洋公園會將成功參賽作品上載到比賽網站（https://40a.oceanpark.com.hk），並於12月7日至31日開始接受投票。得票最多嘅參加者可贏得有效期長達10年嘅智紛全年入場證優越卡4張，結果會喺明年1月10日舉行嘅海洋公園40周年慶典同埋海洋公園網站公布。