「年度新聞」袁國強揀宣誓釋法

【明報專訊】2016年將近尾聲，律政司長袁國強噚日出席由多間傳媒機構合辦嘅十大新聞選舉，喺近30件年度大事中，選出青政議員宣誓同釋法風波為今年最大新聞。袁國強話，事件有好多方面值得反思，包括港獨出現嘅背景、往後點樣處理相關事件，亦可以反思釋法引起嘅長遠議題，例如點樣喺一國前提下更好落實兩制，令兩制優勢獲尊重。佢形容，自己作為律政司長，比較關心同法律界有關嘅事。


問到釋法同司法獨立嘅關係，袁國強話，最重要係去了解《基本法》，因為基本法保證香港司法獨立同法律制度，另一方面，釋法反映一國兩制下，香港普通法同全國人大常委制度之間嘅聯繫，而有關釋法嘅基本法第158條，亦將香港普通法同內地法制連結。


至於邊單新聞係第二重要呢？袁國強就揀立法會拉布拉倒醫委會改革，因為社會好多人關心醫改，亦覺得有需要，但立法會因為某啲原因未能通過。佢話，大家可以藉此反思議員嘅責任，同立法會應該點樣運作，先可以解決香港面對嘅問題。