民主黨主席得一人爭 卿姐話唔理想

【明報專訊】民主黨下周日（4日）改選領導層，即將卸任主席嘅劉慧卿（卿姐）唔會競逐任何職位，決意「裸退」，佢噚日就搞記者會講吓對自己同埋黨嘅未來展望。今年換屆只得立法會議員胡志偉選主席，卿姐形容無競爭係唔理想，但強調唔係黨內唔畀競爭，只係無其他人出嚟選，笑言可能因為志偉嘅震懾力同聲望太勁。


卿姐話，自己唔選主席係因為已經做咗4年，換領導層都係健康嘅事。咁卿姐支唔支持志偉做主席？心水副主席人選又係邊兩個呢？佢話自己呢幾日仲係主席，要保持中立，但就列出多個做主席嘅條件，包括能幹同有遠見。唔知志偉符唔符合呢？


卿姐話，即使唔係政黨領導層或議員，亦有好多事可以做，自己會先安頓落嚟，睇吓未來有咩角色，佢強調自己唔會選特首，但會繼續中國維權律師關注組嘅工作，同幫民主黨手。