55歲不能再飛 空服員拍片爭延遲退休

【明報專訊】國泰空中服務員工會近日同緊資方展開年終談判，一班空中服務員近日仲走出飛機「轉行」拍片，題目好慘咁叫做《那一天我們不能再飛》，原來係講空中服務員要喺55歲就退休嘅情况，工會希望可以爭取將退休年齡延至65歲。


工會日前喺佢哋嘅facebook專頁上載一段3分幾鐘嘅短片，短片中由工會副主席畢珮瑩開場，表明工會今年想資方關注年齡歧視問題，將空中服務員嘅退休年齡延至65歲，之後就出現一個小劇情，講資深空姐點喺條街帶住剛入職嘅空姐為心臟病人急救。


已離職嘅港龍空勤人員協會前主席莫海珊有現身說法，話離職係一個「好無奈嘅決定」，因為要喺55歲再搵一份新工「係好困難」，又指打工仔65歲先可以拎到強積金，但國泰嘅空中服務員喺55歲就要退休，經濟同心理上都會好「恐慌」，係一個「好唔貼地」嘅做法。工會之後仲收到多過3200個支持取消年齡歧視嘅簽名，亦將呢啲簽名交到資方手上。