建制4青年團球場決高下

【明報專訊】雖然天氣凍凍哋，青年民建聯、經民聯青年事務委員會、新民黨青年委員會及自由黨青年團周日都嚟咗場羽毛球聯誼賽，決賽係青年民建聯對新民黨青年委員會，打到決勝局，由青年民建聯顏汶羽伙拍陳穎欣，對戰新民黨姚嘉俊及陳敏娟，最後新民黨以局數2比1奪冠。


晚飯約譚志源交流

比賽戰情激烈，打完波後4個黨派青委會成員齊齊食晚餐，仲邀請咗政制及內地事務局長譚志源（Raymond）嚟分享工作點滴，Raymond就講吓自己以前打羽毛球、籃球嘅事，但各政黨代表就乘機就選舉點票流程、過往選舉經驗表達意見。


有份統籌活動嘅顏汶羽話，希望日後舉辦更多交流活動，亦會爭取喺工作層面跨黨派合作，而今次都有邀請工聯會成員參加，但對方有地區活動，未能派人嚟打波。